Turkey-in Israel nena insumdawn tawnna titawp lailawk

Turkey Ministry of Trade chuan Gaza mipuite tawrhna in ziaawm lam a pan theih loh vangin Israel nena an insumdawn tawnna chu an titawp dawn tih an puang. Turkey leh Israel insumdawn tawnna inkara bungraw che vel hlut zawng hi kum 2023 khan USD tld 6.8 hu nia chhut a ni.

Insumdawn tawnna titawp tura thutlukna hi nimin khan puanzar niin, Israel aṭanga bungraw lakluh leh thawn chhuah chu a zavaia tihtawp tur a nih thu Ministry of Trade chuan an tarlang. Ministry thuchhuah chuan,"Israel-in Gaza mipuite chhawmdawlna tur ṭha tak leh buaina awm loa Gaza-a a luhtir hma loh chu Turkey hian insumdawn tawnna titawp tura a thutlukna hi khauh takin a kengkawh ang" tiin an tarlang.

Israel foreign minister, Israel Katz chuan tunhnai mai khan Turkey president Recep Tayyip Erdogan chu na taka sawiselin, lawng chawlh hmuna Israel bungrua dang ṭhinah a puh. Erdogan chet dan chuan Turkey mipuite leh sumdawngte a ngaih pawimawh lohzia a tilang niin a sawi. Katz chuan Israel foreign ministry chu Turkey aiawh tur insumdawn tawnpui tur dang zawng tura a hriattir tawh thu a sawi bawk a ni.