Palestinian journalist-te hnenah UNESCO-in world press freedom prize hlan

World Press Freedom Day, May 3-a United Nations Educational, Scientific and Cultural Organization (UNESCO)-in a hman pualin, Ningani khan Gaza strip-a Israel leh Hamas indona chanchin ziaktu, Palestinian journalist zawng zawngte hnenah world press freedom chawimawina a hlan.

International jury of media professionals kaihruaitu, Mauricio Weibel chuan,"Lungngaihna leh kawl eng hmuh tur awm lo beiseina a bo hun lai khawvelah hian Palestinian journalist-te kan thlawpna leh kan hriatrengna hi lantir kan duh a ni. Hun harsa tak karah indona hun khirh tan hlimthla hmuh theih leh hriat theihin min chhawpchhuahsak a ni," a ti. UN High Commissioner for Human Rights, Volker Turk chuan,"Journalist kan chan apiang hian kan khawvel pawn lama kan mit leh beng kan chan a, sawi theih nei lote'n thu an sawi chhuahna hmanrua an chan bawk a ni," a ti.

New York-a innghat; Committee to Protect Journalists (CPJ) chuan Israel leh Hamas indona avang hian press mi 97 lai an thi tawh niin a tarlang a, tin, heng zinga mi 92 hi Palestinian mi an ni bawk. October 2023-a Hamas-in Israel an bomb hnu aṭangin Israel leh Hamas-te hi thla ruk chhung zet chu an indo chhunzawm tawh a, mi 35,000 chuangin nunna an chan phah tawh a, Hamas hian Israel mi an hruai bo, mi 129 zet an la hreng chhunzawm bawk.

Reporters Without Borders (RSF)-in kum tina world press freedom index a tihchhuah ṭhinah kum 2024 report pawh a chhuah leh tawh a, RSF chuan he index hnuaiah hian ram 180-te a endik ṭhin a ni. Press mite zalenna leh himna atan RSF-in report an tarlan a che ṭha ber chu Norway niin, ram tichhe ber hi Eritrea niin Syria, Afghanistan, North Korea leh Iran te'n an dawt a ni.