US leh a ṭhianṭha ram defence minister-ten nghet zawka thawh hona neih an duh

US, Australia, Japan leh Philippines defence thuneitu sangte chu Ningani khan Hawaii-ah a vawi hnih nan inhmu khawmin, hetah hian ram pali ten nghet lehzuala thawh hona neih an rel. Ram palite hi nikum khan Singapore-ah an lo inhmukhawm tawh a, thla hmasa mai khan South China Sea-ah naval exercise an lo nei ho tawh bawk.

U.S. defence secretary Lloyd Austin chuan ram pali sipaiten thla hmasaa intuaihriamna an lo neih tawh chu an hlawkpui thu sawiin, khawvel insumdawn tawnna tuipui kawng pawimawh a dan kenkawh an ngai pawimawh tih a sawi bawk. Australian defence minister Richard Marles chuan defence exercise tam zawk neih dan tur an sawi ho niin a tarlang ve bawk. Marlers chuan democrary ram palite inhmukhawm chuan South China Sea leh a chheh vela dan leh hrai kenkawh an ngaih pawimawh zia a tilang niin a sawi.

Heng ram palite hi South China Sea-a China lian zel leh hmalakna tihtawp duhtute an ni a, he tuipui hi insumdawn tawnna kawng pawimawh tak a nih vangin ram pakhat thuneihna hnuaia awm lo a, zalen taka khawvel ram zawng zawng ten he tuipui kalkawng hi hmang se an duh a ni. Hetianga an awm theih nan hian US chuan a indo lawng leh indo thlawhtheihna chu South China tupui lamah hian tam tak a tir chhuak tawh a ni. China erawh chuan US-in Asia-a a ṭhianṭha ram thlun zawm ngheh zel a tum chhan chu China lian zel tur ven nan a nih thu sawiin chumi chuan Asia-a remna awm chu a tiderthawng niin an sawi thung.