Myanmar sipai sorkarin foreign work permit a titawp

Myanmar-a sipai sorkar chuan ram pawn lama hnathawh phalna a pek ṭhin, foreign work permit chu a titawp.

Sipai sorkar hian helpawl hrang hrang aṭanga beihna a tawh chhoh reng avangin, sipai tha tihchakna turin an ram ṭhalaite kum hnih tal sipaia ṭan ngei ngeina tur dan a hmang a, hei vang hian ṭhalai tam tak chuan Myanmar hi an chhuahsan a ni.

Ṭhalaite sipaia kum hnih tal an ṭanna tur, military conscription law hman a ni dawn tih sorkarin a puan hnuah, Yangon-a foreign embassy hrang hrangah visa diltu an pung nasa hle a, hei bakah Thailand rama tlanchhia pawh an tam niin media lam chuan a tarlang. Hei vang hian labour ministry chuan ram danga hnathawh phalna an pek ṭhin chu an titawp lailawk rih tih sawiin, hei hi an ram pawn lama kal chhuah tumte chungchang zir chian phawtna atan a ngai niin an a sawi.

International Labour Organi­sation-in a chhut danin, kum 2020-ah khan Myanmar mi, ram danga hnathawka awm hi maktaduai li chuang an tling tawh. Chhinchhiah kher loh pawh mi dang tam tak an awm rin a ni bawk.

Myanmar sipai sorkarin a hman thar, military conscription law hi sipai sorkar hmasa zawkin kum 2010-a a siam ni mah se, an hunlai hian hman a ni lo. He dan hnuaiah hian mipa kum 18-35 leh hmeichhia kum 18-27 inkarte chu sipaia ṭang tura koh luih theih vek niin, a tlem berah kum hnih tal an ṭan a ngai a ni. State of emergency hnuaiah an service hun hi kum nga thlenga pawhsei theih a ni a, sipai ṭang tura koh, kal duh lote pawh kum nga thlen lung in tantir theih an ni bawk a ni. Myanmar sipai sorkar hian kum 2021-a civil sorkar thuneihna a hnehchhuh khan an ram pumah state of emergency hi puangin, thla ruk danah a la pawtsei chhunzawm zel a ni.

Sipai lamin an tarlan danin, military conscription law hnuaia sipaia koh batch hmasa ber chuan training an nei mek a, sipai thupuangtu chuan ṭhalai koh theih hi mi mtd 13 vel an awm a, mahse, sipaite hian kum khatah mi 50,000 chauh training an pe thei a ni, a ti.