Nepal pawisa note tharah India-in a ram anga a chhal hmun tarlang

Nepal cabinet Zirtawpni liam taa ṭhu khawm chuan Nepal pawisa note (NPR100)-a milem an dah ṭhin an thlak thu leh an siam thar thu puangin, pawisa note-a milem chuangah hian India-in a ram chin anga a chhal dah tel a ni.

Nepal sorkar thupuangtu, Rekha Sharma chuan prime minister Pushpakamal Dahal kaihhruai Nepal cabinet ṭhu khawmin an ram pawisa note-a milem chuang an siam thar thu leh, Nepal pawisa; NPR100-ah hian Lipulekh, Limpiyadhura leh Kalapani hmunte tarlan a nih thu a sawi. Nepal hian June 18, 2020 khan an ram political map lo siam ṭha tawh bawkin, heng hmun pathumte hi an ram chinah a rin lut a ni. Hemi ṭum hian India sorkar chuan heng hmunte hi mihring luah theih loh hmun, ram zauhna mai mai a nih thu tarlangin, Nepal chuan an duh anga ramri an rin danglam avangin engmah a danglam phah lo tiin a lo sawi tawh a ni.

Tun ṭuma Nepal-in an ram pawisa a siam ṭhata India nena an ramri anga chhiar hmunte an ram chhunga mi anga a tarlan chungchangah, India external affairs minister, S. Jaishankar chuan ramri chungchanga inbiakna neih mek laia Nepal hmalak dan chuan a tak taka engmah a tihdanglam theih loh tur thu a sawi. India sorkar hian Lipulekh, Limpiyadhura leh Kalapani te hi a ram chin anga a ngaih reng a ni.