Israel-in Rafah aṭanga insawn chhuak turin hriattir

Israel sipaite chuan an ruahman lawk tawh angin, Gaza Strip chhim lama Rafah-ah Hamas pawl laka beihpui thlakna chu kaltlangpui ngei an tum.

Rafah khawpui khawchhak lama cheng, Palestinian mi nuai khat vel chu Khan Younis leh al-Mawasi-a huminatarian area an siamah inthiar chhuak turin Israel sipaite chuan an hriattir.

Gaza Strip-ah hian Israel leh Hamas te hi thla sarih zet an indo tawh a, hmun tam takah Hamas hmunhmate an tihchhiatsak hnuah, Israel chuan Hamas laka hnehna pumhlum chang turin Rafah hian an lak leh ngei a ngai tiin a sawi a ni.

Hetih lai Gaza Strip-a indona hlaua tlanchhia tam tak chu Rafah khawpuiah hian an tlanchhiat avangin, UN leh US chuan he khawpui hi beih a nih chuan mipuite tawrhna thleng chu a rapthlak dawn lutuk niin an sawi a, beihpui thlak lo tur hian Israel hi an nawr reng a ni, ram dang pawhin an ruahmanna hi kaltlangpui lo turin a ngen bawk. Rafah-ah hian indona hlaua tlanchhia, mi maktduai 1.2 vel an khawsa mek niin World Health Organisation chuan a sawi. Mahse Israel chuan Rafah-ah hian Hamas battalion li an la awm tih sawiin, an fighter sang telte an la inkulh a ni tiin, heng mite hi beih ngei a tum thung.

Israel Defence Forces (IDF) thupuangtu Lt. Col. Nadav Shoshani chuan Rafah-a an hmun thlan bik laiah chauh beihpui hi an thlak dawn tih sawiin, insaseng tura an hriattirna pawh hi ash-Shokea area huam chhung, as-Salam, Janina, Tabet Ziraa leh al-Byouk hmuna mite an ni. Flyer, SMS message, phone call leh media broadcast hmangin ngenna hi an siam tih an sawi.

Israel defence minister Yoav Gallant chuan Rafah-ah an sipaite chet lak a ngaihna chhan hi Hamas-te'n Gaza-a inkahhai puan a nih theihna tura rawtna siamte an pawm theih loh vang a ni tiin, he rawtnaah hian Palestinian firfiak pawl hian Israel an beih ṭuma an mi man, an la hren mekte chhuah tura phûtna a tel a ni.