Israel cabinet-in an rama Al Jazeera office khar

Israel prime minister Benjamin Netanyahu-a kaihhruai Israel cabinet chuan Qatar rama mi, khawvel huapa chanchinthar thehdarhtu hlun leh lian ber pawl, Al Jazeera office an rama awm chu Pathianni khan khar turin a hriattir.

Israel-in ram dang chanchinthar la khawmtu a dan leh tihtawp hmasak ber nia hriat, Al Jazeera hi Israel cabinet chuan an rama an thiltih zawng zawng titawp vek turin an hriatttir a ni. Al Jazeera office khar a nih chungchangah hian Prime Minister Netanyahu chuan Al Jazeera reporter-te chuan Israel himna an tihchhiat thu leh, an sipaite ep zawnga cheah a puh a, an rama Hamas-te mit leh ka anga awm an nih thu a sawi tel bawk.

Hetih lai hian Al Jazeera erawh chuan Israel-ah an office kharsak an nih avang hian khawvel huapa journalist emaw, dan awm thei ang zawng zawng hmang emawa Israel-a chanchinthar lak khawm hna kalpui leh dan tur an ngaihtuah tur thu sawiin, mipuite chanvo a nih thu an sawi. Israel chuan press mite zalenna a rahbehna leh Gaza Strip a beih dan zawng zawng thup a tum a ni tiin, Israel hmalak dan chu khawvel dan leh mihring dikna chanvo palzutna a ni, an ti.

Al Jazeera office kharna thupek chhuah a nih hnu lawk hian Israel-a cable pe chhuaktu lian ber aṭanga paih nghal an ni a, mahse, an website leh platform hrang hranga stream-na erawh hman theihin a la awm thung. Israel-a Al Jazeera office kharsak hian Gaza Strip-a an chetna a dal tel lo a, helai hmun hi Israel-in thunun mah se, a ram pumhlum a ni lo a ni. Al Jazeera hi Israel bakah Middle east ram dang; Saudi Arabia, Jordan, United Arab Emirates (UAE) leh Bahrain te chuan an lo khap ve tawh bawk a ni.