Brazil-ah tuilian vangin mi 78 an thi tawh

Brazil chhim lamah ruah tla tam avanga tuilian chuan chhiatna tam tak a thlen belh zel. Pathianni thleng khan chhinchhiah theih chinah mi 78-in nunna an chân bakah mi nuai 1 chuang chuan an chenna in an chhuahsan tawh a ni. Brazil-a khaw 371 chuan tuilian avang hian harsatna an tawk mek a ni.

Khaw tam tak chu an khaw pum tuiin a chim avangin harsatna lian tak an tawk mek a, chhanchhuah hnathawktu an indaih lo hle. Ruah sur nasa leh tuilian avang hian tui thianghlim in tur an tlakchham bakah kâwlphetha an nei ṭha lo hle a, nitin mamawh an tlachham ṭan tawh a ni. Chhanchhuah hna thawk tur hian sipai 3,000, kangṭhelhtu leh hetiang lama mithiam eng emaw zat tirh luh an ni tawh a ni.

Civil defence thuneitute chuan khuarel chhiatna an tawh avang hian mi 105 chu chin hriat lohin an awm mek tih an tarlang a, climatologist-te chuan Brazil chhim lama khuarel chhiatna thleng mek hi sik leh sa inthlak danglam avanga chhiatna leh El Nino thlen chhiatna inchawhpawlh tiin an sawi a ni.

Rio Grande do Sul governor, Eduardo Leite chuan an chhiatna tawrh chu indona hmuna chhiatna thleng ang mai a ni tih a sawi a, siamṭhat hna pawh a hautak dawn thu a tarlang. Brazil president Luiz Inacio Lula da Silva chuan siam ṭhat hna chu sorkar kutah a awm dawn niin a sawi ve bawk.