Kim-an nuclear ralthuam hman mai an tum lo tih a sawi

North Korea ram hotu, Kim Jong-un chuan an ram khawpui, Pyongyang-a National Workers' Party Congress an neihah an ram chu nuclear state an nih thu a sawi a, hetih rual hian nuclear ralthuamte chu ramdangten an tibuai a nih loh chuan an hman mai loh tur thu a sawi.

Kar kalta Zirtawpni aṭang khan Workers' Party Congress hi neih a ni a, ram≠chhung hmun hrang hrang aṭangin palai an kal khawm a ni. Party Congress hi kum 35 chuang hnua an neih leh vawi khatna a ni.

Kim chuan an ram nena inhal tak ram dang≠te pawh inlaichinna ṭha siampui a duh mai thei niin a sawi a, a ram hming hi sawilang lo mah se US leh South Korea ram a sawinaah ngaih a ni. Heng ramte nen hian inhriatthiam tawnna ṭha zawk an neih theih nan inbiakna pawh neihpui leh an tum tih a sawi.

North Korea hi kum 2003 khan nuclear non-proliferation treaty aṭangin a inhnukdawk a, kum 2006 aṭang khan nuclear test a nei ṭan a ni. Kum 2011-a Kim Jong-il a thih khan, a fapa Kim Jong-un hian an ram hruai hna hi a chelh chhunzawm a, thuneihna a chan hnuah nuclear test ṭum hnih bakah ṭum hnih hlawhtling takin rocket an kap chhuak tawh a ni.

Rorellai, Wokers' Party chuan an ram hruaitu, Kim Jong-un hi title thar pek a tum. Korean Central News Agency chuan Congress neih meka thu ngaihtuah tur, agenda zingah hian party Central Committee leh Central Audit Commission hnathawh dan thlir let te, party rules siamṭhat te, party top post-ah Kim dah leh party central hruaitu thar tur thlante a tel niin a tarlang. Kim hi party hruaitu ni mah se, first secretary tih a ni. A pa leh a pu-te nihna lo chelh tawh, party general secretary nihna pek tum a ni.