Canada ramkangin ziaawm lam pan thei lo

Canada rama Alberta province-a ram-kang chuan ziaawm lam a la pan thei lo a, Alberta province ṭhenawm Saskatchewan province dinhmun pawh a him tawh lo hle niin official-te chuan an sawi.

Alberta province-a ram kang hian ram hectare 200,000 chuang zeta zau a tuam tawh a, Fort McMurray khaw chhung a kan kai avangin he khuaa cheng zawng zawngte chu hmun him lamah an insaseng vek tawh a ni. Khaw chhung aṭanga hmar lama tlanchhiate dinhmun chu a him tawk loh avangin sorkar chuan thlawhtheihna hmangin a thiarchhuak leh bawk.

Alberta Emergency Management Agency chuan kangmei chhuak chu a la nasa hle tih a sawi a, an ṭhenawm Saskatchewan province a kai mai a hlauhawm hle tih a sawi. Vawiin hian ruah a sur beisei a ni a, ruah a sur chuan ram kang hian ziaawm lam a pan beisei a ni.