Canada-a kangmei chhuakin Fort McMurray-ah in 20% a kang chhia

Canada ram kangin Alberta province-a Fort McMurray khuaa chenna in 20% a kang chhia.

Fort McMurray khua leh a chhehvela cheng mi nuaikhat chuang chu sorkarin insawnchhuak tura a hriattir hnuah hmun him lamah an inthiarchhuak vek tawh a ni. Kangmei chhuak hi la reh lo mah se, a ziaawm ṭan tawh nia sawi a ni.

Kangṭhelhtute chuan an rama kangmei chhuak hian ram square km 1,610 a tuam tawh niin a sawi. MP David Yurdiga chuan Pathianni khan Fort McMurray khua hi tlawhin, khawpui chhung hmun tam zawk chu awmna atan ala hlauhawm tih a sawi. Yurdiga chuan kangmei chhuakin khawchhung a tihchhiat dan chu a tak pawh a ang lo zawk hiala tih sawiin, khawpui chuan a dinhmun ngai awh leh turin kum rei tak a mamawh dawn tih a sawi bawk.

Alberta province-a ram kang hian a ṭhenawm, Saskatchewan province a kai a hlauhthawnawm hle. Saskatchewan leh Northwet Territories-te chu ram kang khu hian a bawh nasat avangin boruak pawh a ṭha lo hle. Thuneitute chuan mipuite chu an tukverh leh kawngkharte khar ṭha turin an chah a, pawn chhuak tam lo turin an ngen bawk.

Canada official-te chuan Alberta oil dahna hmun tam zawka kangmei chhuak chu thla eng emaw zat chhung chu a reh mai an rin loh thu an sawi. Khaw chin zirtute chuan nimin khan Fort McMurray-ah hian ruah tam vak loh a sur an rin thu an sawi a, hei hian boruak pawh a tihziaawm deuh an beisei a, mahse kangmei chhuak ṭhelh rem vek tur chuan thla tel a ngai dawn niin an sawi.

Fort McMurray awmna hi khawvela oil reserve lian ber pathumna awmna bial chhunga mi a ni a, ram kang vanghian oil company lian-a thawk ho pawh sawnchhuah an ni. Canada ramin oil a siamchhuah hmun li-a ṭhena hmun khat chu kangmei chhuak vang hian a bahlah phah a, hei hian an ram economy thlenga a nghawng rin a ni.