Taiwan company lakah Vietnam an lungawi lo

Vietnam khawpui, Hanoi-ah Pathianni khan tuipuia sangha tam tak thihna thlentua an puh Taiwan company lakah lungawi lohna an lantir.

Mipuite hi Hanoi-a dil lian ber kamah pungkhawmin, central province Ha Tinh-a sangha tam tak thihna thlentuah Taiwan Formosa company an puh. Formosa company hian he province-ah hian steel plant a nei a ni. Thla hmasa kha Ha Tinh province-a tuipuia sangha thi tam tak chu lui kamah an len chhuak a, he tuipuiin a zawm province pathum dangah pawh sangha an thi nasa hle.

Hetihlai hian he thil thlen chungchang chhuinaa hmasaah sangha thihna thlentuah Formosa company hi mawhphurtu ni lo niin a sawi a, company pawhin tih dik loh an neih loh thu a sawi. Mahse mipuite chuan hei hi an pawm thei lo a ni. Kar hmasa khan Hanoi leh Ho Chi Minh City-ah nawrh an lo huaihawt tawh bawk a ni.

Nawrh huaihawtnaa tel, army veteran Nguyen Manh Trung chuan tun ang renga Vietnam tuipui a bawlhhlawh a hriat ngai loh thu a sawi.