Hamas-in Gaza inkahhai rawtna siam a pawm ; Israel lamin thuchhuah a la nei lo thung

Israel-in Gaza Strip chhim lama Rafah khuaa beihpui thlak a tum avanga civil mite insaseng tura hriattirna a tihchhuah hnuah, Palestinian pawl Hamas chuan Gaza-a inkahhai puan a nih theihna tura Qatar leh Egypt rawtna siamte chu a pawm tih a sawi.

Hetih lai hian hemi chungchangah hian Israel lam chuan thuchhuah an la nei lo a, US pawhin Hamas-in chhanna an pek chu an enfiah tur thu a sawi bawk. Israel prime minister Benjamin Netanyahu chuan inkahhai puanna tura rawtna siamte hi Israel thil phût ang a ni lo hle tiin a lo sawi tawh a, mahse, sorkar chuan inbiaknaa an ram aiawhtu tur erawh a tirh tho tur thu a sawi. Qatar foreign ministry pawhin Israel leh Hamas-te'n indirect talk an neih chhunzawm theihna turin Cairo-ah palai an tir dawn tih nimin khan a tarlang bawk.

Hamas chuan thuchhuah siamin, an pawl hotu Ismail Haniyeh chuan inremna a awm theihna tura hma latu, Qatar leh Egypt palaite hnenah inkahhai puanna tura rawtna an siamte chu an pawm thu a hrilh tih an tarlang. Hamas official chuan Israel chuan inremna siamna tur hi a pawm nge, a lo dang dawn tih a tihfel ve thuai a ngai a ni, a ti.

Ṭum eng emaw zat inbiakna neih a nih hnuah pawh inremna hi an la siam thei lo a, hetiang a thlen mek karah hian Israel chuan Rafah-a Hamas hmunhmate beih leh ngei a tum tih sawiin, Rafah khawchhak lam biala civil mite chu insawn chhuak turin Thawhṭanni khan hriattirna a lo tichhuak tawh a ni.

Israel-in Rafah border crossing thunun tawh

Israel Defense Forces (IDF) chuan nimin khan Rafah border crossing-a Gaza lam chu an thunun tawh tih an sawi a, Rafah khawchhak lama Hamas firfiakte hmun chu an beih thu an tarlang.

Palestinian leh Egypt official-te chuan Hamas firfiakte la chakna bial awm chhun, Rafah-ah hian Israel tank-te pawh an lut tawh niin an sawi a, Egypt nen an inrina aṭanga meter 200 vel leka hla pawh an thleng phei tawh a ni, an ti.

Israel thuneitute chuan Rafah-a Hamas-hoin an lo beih letnaah an sipai pathum an thi tih an sawi a, Palestinian official-te chuan Rafah-a inbeihnaah hian Palestinian mi 19 thiin an zingah nausen pawh a tel tih an sawi ve bawk.