Germany-in Russia aṭangin a palai a ko kir

Germany foreign ministry chuan Russia rama an palai chu a ko kir tih a puang. Hei hi German Chancellor Olaf Scholz-a awmna party, Social Democratic Party-in cyberattack an tawh chungchang chhui chian a nih hnuah Russia chu a inhnamhnawih ngei nia an hriat vang a ni.

Social Democratic Party (SDP) chhunga hruaitu pawimawh tak takte email chu kum 2023 kum tir lam khan beih a ni a, Germany sorkar chuan chhui zuina neiin a beitute hi kar liam ta Zirtawpni khan an hriatchhuah thu an puang. He cyberattack hi APT28 tih ngei a ni tih an hriat tahw thu foreign minister Annalena Baerbock chuan a puang a ni. APT28 hi Russia sipaia enthlatute thu hnuaia awm an nih thu sawiin, he inbeihna hi Russia-in Germany a beihna ang a ni, a ti

Germany foreign ministry thupuangtu chuan Russia rama an palai awm mek Alexander Graf Lambsdorff chu koh kir a nih thu sawiin, thil pawimawh hrang hrang sorkar hotute nen an sawiho dawn a, kar khat chhung a cham hnuah Moscow lama a let leh tur thu a sawi bawk. Germany sorkar chuan he inbeihna hi an ngai thutak hle tih ministry thupuangtu chuan a sawi a ni.

ATP28 hi 'Fancy Bear' tia hriat an ni bawk a, khawvel ram hrang hranga cyberattack thlengah inhnamhnawihna nei nia hriat an ni. Germany chuan SDP beih a nih thu hi nikum khan a sawi. Germany bakah hian Czech Republic chuan an ram chhunga hmun pawimawh tak tak chuan cyberattack a tawk tih puangin, a tituah ATP28 chu an puh ve bawk. European Union ram pahnihin beih an tawh avang hian EU chuan Russia chu fimkhur turin a lo chah tawh a ni.