Myanmar buaina avanga tlanchhia mi mtd. 3 tling tawh

United Nations chuan Myanmar-a sipaite'n thuneihna an chan hnua tualchhung buaina chhuak avanga tlanchhia chu mi maktaduai thum an chuang tawh tih a sawi.

UN chuan sipaite leh armed group hrang hrangte inbeihna a nasat chhoh leh tak avangin, thla ruk liam ta chhung khan hmun him lama tlanchhia hi 50% zetin an pung tih a sawi. UN Resident and Humanitarian Coordinator for Myanmar chuan buainain zual lam a pan chhoh leh avangin, an ram chhung veka himna zawnga tlanchhia civil mi hi maktaduai thum an chuang tawh a ni tiin, kum 2021 February thlaa sipaite'n civil sorkar thuneihna an hnehchhuh hnuah ram chhung hmun tam takah sipai leh sipai sorkar dodaltute inkarah buaina a chhuak a, mi tam takin an in leh lo an tlanchhiatsan a ngaih phah a ni, a ti.

Buaina avanga in leh lo tlanchhiatsan zinga a zahve vel hi Myanmar hmarthlang lama Chin, Magway leh Sagaing biala mite an ni a, chhim chhak lamah mi nuai 9 vel awmin, khawthlang lam Rakhine state-ah mi nuai 3.5 vel an awm bawk.

UN chuan hun rei tak ram chhung buaina an thlen tawh avangin mi maktaduai 18.6 vel chu chhawmdawl ngaiin an awm mek a ni, a ti. Mahse fund an dawn ṭhat loh avangin ṭanpui hna thawhna kawngah pawh duh angin hma an la thei lo a, chhawmdawlna hna thawhna atana sum mamawh zat aṭang hian 5% vel chiah an la dawng tih a tarlang. Nikum khan UN human rights chief Volker Turk chuan sipaite chu chhawmdawlna thawn luh a mamawhte hnen thleng loa dansakah a puh a ni.