Berlin-a Palestinian thlawpa nuarte police-in hnawt darh

Germany khawpui, Berlin-a Berlin free university-ah Palestine ram thlawptu zirlai pung khawmte chu Thawhlehni khan Berlin police-te'n an hnawt darh.

Berlin free university-a zirlai nawrh huaihawtte hian campus chhungah riahbuk 20 chuang siamin hun rei tak nawrh tumin an inbuatsaih a, mahse, Berlin police-te'n campus chhuahsan tur hian an hriattir a ni.

University thuneitute chuan nawrh huaihawtte hi an campus aṭanga nawr chhuah an tum thu sawiin, hemi hma hian Berlin police-te chuan nawrh huaihawtna hmun hi an thleng a, hun eng emaw chen an thlithlai hnuah Police-te hian zirlai nawrh huaihawtte hi au rinna hmanga kal darh tura an hrilh hnuah tihluihnain an hnawt darh niin an sawi.

Gaza strip-a Israel leh Palestinian thlawp Hamas-te inbeihna chu ram hrang hrangin inkahhai puang tura an ngen hnuah pawh la chhunzawm zel a ni a, hei vang hian US-a university zirlai, Palestinian thlawptute chuan nawrh an huaihawt bakah, Australia-ah pawh university zirlaite'n nawrh an huaihawt ve bawk a ni. Germany bakah hian Europe hmun hrang hrangah Palestinian thlawpa zirlai nuar hi an pung zel a, Finland, Denmark, Italy, Spain, France leh Britain-ahte pawh US-a unversity zirlaite hnung zui hian nawrh huaihawt a ni tawh bawk. Netherlands-ah chuan Palestinian thlawpa zirlaite nawrh huaihawt avanga buaina chhuakah thuneitute chuan mi 125 an man tawh thu an tarlang. Hmun hrang hranga zirlai nuarte hian an campus chhungah riahbuk sualin campus hi an riah chilh ṭhin a, hei vang hian zirna pawh a khaihlak phah hle a ni.