US-in Israel hnena bomb thawn tum a titawp rih

United States (US) chuan Israel-in Rafah-a beihpui thlakna lian tham tak a kalpui hlauhthawn avangin, Israel hnena bomb a thawn tum chu a titawp rih niin senior official chuan a sawi.

US-in Israel hnena a thawn tur hi 1,800 2,000-pound (900-kilogram) bomb leh 1,700 500-pound (225-kilogram) bomb an ni. Israel-in Rafah-ah beihpui thlak a tum chu US hian kaltlangpui lo turin a lo ngen tawh a, mahse, Israel hian beih ngei a tum thu a sawi avangin a ralthuam thawn tur pawh hi a titawp ta rih a ni. A hnu lama an thawn chhunzawm dawn leh dawn loh chungchangah thutlukna an la siam lo.

Israel chuan Hamas laka hnehna pumhlum an chan theihna turin Rafah-a an firfiak pawl mi leh sa la inkulhte chu beih ngei a tum thu sawiin, Rafah khawchhak lama awm civil mite pawh inthiarchhuak turin a lo hriattir tawh a, tank-te pawh a tir lut tawh bawk. Rafah khawchhak lama an beihpui thlakna tur chu hmun thlan bik laiah leh, hun pawh duh rei lo tur niin an sawi a, Hamas-hoin ralthuam an tawlh luhna ṭhin dan chahsak chu an tum ber tih a sawi a ni. US chuan an chet dan hi a lo thlithlai reng dawn tih a sawi.

US hian hun rei tawh tak aṭangin Israel sipaite puihna tur hi a pe tawh ṭhin a, thla liam ta mai pawh khan Congress chuan Ukraine, Israel leh an thawhpui ram dangte puihna atan USD tld. 95 national security bill a pass a ni. He package-ah hian Israel puihna tur USD tld. 14 a dah tel.