Kyrgyzstan prime minister a bâng

Kyrgyzstan prime minister Kubatbek Boronov chuan an rama Central Electoral Commission-in Pathiannia Parliament inthlan result a pawm loh avangin Thawhlehni khan PM a nihna aṭanga banna a thehlut. 

PM Boronov bakah Parliament speaker Dastan Jumabekov-te chuan an ram khawpui, Bishkek-a legislator meeting an neihnaah banna hi an thehlut a ni. Hemi hnu hian Parliament emergency session neih nghal a ni a, eptu pawl Mekenchil party dintu Sadyr Zhaparov chu acting prime minister atana ruat nghal a ni. 

Pathiannia inthlanpui neihah vote tihchingpen nia sawiin Thawhṭanni khan eptute chuan nawrh an huaihawt a, security force-te nen innawr buaiin mi 590 chuangin hliam an tuar a, mi pakhat a thi bawk. Nawrh huaihawtte hian President office leh Parliament awmna, White House chu an luhchilh bawk. Eptute lamin na taka an nawr hnuah, Central Electoral Commission pawhin Pathiannia inthlan result chu hnawl a nih thu a puang ve leh ta a ni. 

Eptu pawlten Thawhṭannia sorkar building pawimawhte a lak hnuah politics avanga tantir, eptu hruaitute an chhuah nghal bawk. 

Jail aṭanga chhuah zingah hian acting PM atana ruat Sadyr Zhaparov pawh a tel. Japarov hi kum sarih liamtaa eptuten nawrh an huaihawt ṭuma regional governor kidnap a nih chungchangah thiam loh chantirin, kum 11 tang tura hrem a ni. Ani bakah hian eiruk thubuai avanga kum 11 tang tura hrem bawk, president hlui Alamzbek Atambayev pawh  jail aṭangin chhuah a ni bawk. 

Pathiannia inthlana vote hmu  hnem party pahnihte chu  President Sooronbai Jeenbekov thlawptute an ni. President Jeenbekov chuan eptute thil tum ber chu inthlan result hnawl lam ni loin, amah paihthlak chu niin a sawi. A ṭul a nih chuan ban pawh a inhuam tih sawiin, hruaitu chak tak hnenah mawhphurhna hlan a inpeih tih a sawi. Mahse tu hnenah nge thuneihna hlan a tum erawh a sawi lang lo.