Covid-19 vaccine kumin kum tawpah peih hman tum

World Health Organization (WHO) director-general Dr Tedros Adhanom Ghebreyesus chuan Thawhlehni khan Covid-19 vaccine chu mipuite hman theih tura kumin kum tawp lamah peih fel hman tum a nih thu a sawi.

Dr Tedros chuan ni hnih awh global health body Executive Board ṭhutkhawmah thu sawiin, khawvelin Covid-19 vaccine a mamawh thu a sawi a, vaccine enchhinna neih mekah  a ṭha zawnga hmasawnna a awm thu leh kumin kumtawp lama vaccine chu peihfel hman a nih tur thu hi a sawi a ni.

Ram hrang hrangin an siam Covid-19 vaccine chu clinic hrang hrangah enchhinna neih mek a ni a, hemi kawngah hian ram hruaitute chu an inlungrual a pawimawh hle tih Dr Tedros chuan a sawi bawk. Tedros chuan WHO hriatpuinain Covid-19 vaccine pakua chu enchhinna neih mek a ni a, enchhinna hi tunaia hmasawnna a awm theih nan leh vaccine peih fel a nih huna a sem chhuah dan kawngah ram hrang hrang hruaitute ṭanrual a pawimawh a ni, a ti.

Thawhlehni khan Microsoft founder Bill Gates chuan vaccine peih fel a nih thuai a,sem darh a nih hunah pawh Covid-19 tuar mek ram hausa zawkte pawhin nakkum kum tawp lamah ngai an awh chho thei dawn chauh niin a sawi. Hemi rual hian vaccine enchhin mekte hi a hlawhtling ngei dawn tih pawh hriat a ni lo tih a sawi bawk.