Biden-a'n ralthuam thawn chhuah tihtawpah Israel a vau

United States president Joe Biden chuan Israel-in Rafah beih a tumna a kaltlangpui a, Gaza khawpui chhim lam chu a bei a nih chuan US chuan Israel hnena ralthuam an thawn luh ṭhin an titawp dawn niin a sawi.

Rafah hi Hamas inkhuarna awm chhun a ni tawh nia Israel-in an hriat avangin beih hi a tumruh hle a, Israel prime minister Benjamin Netanyahu chuan Rafah beih chu hnehna pumhlum chan nan a pawimawh tih a lo sawi tawh a ni. Mahse US president Joe Biden erawhin Israel thlirna hi a ṭawmpui lo tih hriattir turin Rafah an bei a nih chuan ralthuam thawn chhuah tihtawpah Israel chu a vau thung. "Rafah hi Israel hian an la bei lo a, an bei a nih chuan ka sawi tawh angin hman aṭanga helai vel buainaa hnehna an chan theih nana pawimawh tak ralthuam kan thawn chhuah ṭhin chu ka titawp ang," Biden chuan a ti.

President Biden chuan Israel invenhim nana rathuam pawimawh tak Iron Dome chu Israel tan an pe chhunzawm zel dawn tih erawh a sawi a, hei hi Middle East ram dangte'n an beih ṭhinna laka inven nan a pawimawh takzet tih a sawi. Hetih lai hian ralthuam dang leh artillery shells-te chu an pek theih dawn loh thu a sawi thung. Tun hnaia Rafah luhka Israel-in an beih chungchang pawh Biden chuan sawiin, an dawhtheih chin Israel chuan an la pel lo tih a sawi a, Israel chuan civil mi tamna lai an la luh loh avangin US chu a la dawhthei rih niin a sawi bawk.