Israel-in Rafah a rûnna African Union-in an dem

African Union chuan Israel sipaite'n Gaza chhim lama awm, Rafah an rûn chu an dem thu sawiin, khawvel ram hrang hrangte chu Israel-in indona zualkai zawnga hma a la reng chu tihtawptir turin an ngen.

African Union hotu, Moussa Faki Mahamat chuan Israel leh Hamas indona vawiin thlenga a la tawp lo leh, Rafah beihna thlenga chhunzawm zel a la ni chu pawi a tih thu leh, Israel-in Palestine tana chhawmdawlna pekna luhka ber Rafah a thunun chu a dem thu a sawi a ni.

Faki hian Israel leh Hamas indona avanga nunna chân tam tak an awm kara indona tizualkai zawnga Israel-in hma a la chu thil ṭha lo tak a nih thu tarlangin, khawvel ram dangte chuan ṭangruala Israel hmalak tumna chu an dan a ṭul a ni, a ti.

Israel leh Hamas indonaah hian inkahhai puan a nih theih nan Egypt chuan inbiakna a kalpui mek a, hetih lai hian Israel chuan Hamas-te'n ṭanpuina an dawnna kawng ber Rafah thunun tuma hma lain, Nilani khan tank nen luhchilhin border crossing hi a thunun tawh a ni. Israel hian Nilaini khan Gaza tana chhawmdawlna thawn luh nan Kerem Shalom ramri chu a hawng leh thung a, hei bakah hian Erez ramri chu Palestine rama chhawmdawlna leh ṭanpuina lak luh nan hman theiha a hawn leh tawh thu an tarlang bawk a ni.