Fiji PM hlui kum khat tang turin hrem

Fiji prime minister hlui, Frank Bainimarama chu Fiji high court chuan Ningani khan a thuneihna hmang sual leh police hnu chhui lai tihtawptir chungchangah thiam loh a chantir a, kum khat tang turin a hrem.

Frank Bainimarama hi military commander hlui niin, 2006 khan sorkar lai paihthlaknaah a hruaitu a ni a, Prime Minister a nih lai, kum 2020-a Fijian university-a eirukna awm police-te'n an chhui lai mek chu chhui chhunzawm phalsak loin, hei vang hian Fiji high court chuan nimin khan kum khat tang turin a chungthu a rel ta a ni. Frank Bainimarama bakah hian police commissioner hlui leh a ṭhian ṭha tak, Sitiveni Qiliho chu he thubuaiah tho hian kum hnih tang tura hrem a ni ve bawk.

Thuhretute chuan Fijian university-ah hian thawktu ṭhenkhat chu bonus pek leh hna kaisan bakah, an hlawh tihpun thua duhsakna uchuak bik tak a awm niin an sawi a, hei hi police-te chuan chhui zuiin a hun laia Prime Minister leh police commissioner-te hian police hnu chhui lai hi an thuneihna hmangin an titawp a ni.

Kum khat tang tura Prime Minister hlui hremna hi chief justice Salesi Temo chuan puangin, Fiji president hlui pahnih dang thusawi denchhenin, Frank Bainimarama hi nungchang ṭha, sualna hranpa em em nei lo nia a lan avangin a hremna hi a tihnepsak a ni.

Bainimarama hian kum 16 zet Fiji-ah hian ro a rel hman a, kum 2022 kum tawp lam khan Sitiveni Rabuka chuan inthlanpuiah hnehin, February 2023 khan Sitiveni chungchang a sawi dan mawi lo tak avangin Fiji parliament chuan 2026 thleng an suspend chhunzawm a ni.