Brazil-a tuilianin in nuai khat dawn tihchhe tawh

Brazil chhim lam, Rio Grande do Sul state-a kar khat chuang ruah sur nasa takin tuilian a thlen chuan chenna in nuai khat dawn a tichhe tawh a, chhiatna thlengah mi 100 vel an thi tawh bawk.

National Confe­deration of Municipalities chuan state chhunga lui lian chhunzawm zel chuan mi maktaduai 1.45 vel a nghawng a, mi nuai hnih vel chuan an chenna in an chhuahsan tawh tih a tarlang.

Rio Grande do Sul state-a khaw 497 zinga khaw 414 chuan harsatna hi tawkin, emergency an puang tawh bawk. Confederation chuan chhiatna thleng avang hian an sum hloh hi USD mtd 904 vel a tling niin a chhut. He state-ah hian kar khat chhung hian thla nga chhunga ruah tui an dawn zat ang vel a sur a, hei vang hian khaw hrang hrang chu tuilian hian a tibuai a ni.