Trump-a'n Covid-19 a la kai chuan debate kan nei lo ang : Joe Biden

US President thlanna neih tura Democratic presidential candi-date Joe Biden chuan a khingpui, president ni lai leh Republican presidential candidate Donald Trump chuan Covid-19 a la kai a nih chuan October 15-a debate ṭum hnihna neih tura ruahman chu neih a duh lo tih a sawi. 

Kum 77 mi Biden leh kum 74 mi Trump-te hian debate hmasa ber chu September 29 khan an lo nei tawh a, debate ṭum hnihna hi October 15-ah Miami-ah neih tura ruahman niin, a ṭum thumna leh tawpna ber tur chu October 22-ah Nashville, Tennesse-ah neih tura tih a  ni. 

Biden chuan Trump-a dinhmun hi eng ang chiah nge a nih tih a hre lo tih a sawi a, debate pawh neih theih chu a duh hle tih sawiin, hemirual hian hri lak aṭanga a la fihlim lo a nih chuan debate neih loh hi a duh tih a sawi. 

Hetih lai hian President Trump chuan Thawhlehni khan a twitter-ah Biden nena debate an neih leh tur chu a nghakhlel tawh hle tih a sawi thung. 

President Trump hi kar liam ta Zirtawpni khan a nupui, First Lady Melania Trump nen Covid-19 an kai tih hriat a ni. 

Trump hi sipai damdawi-in Walter Reed military hospital-ah enkawl a ni a, Thawhṭanni khan hri a la kai chungin damdawi-in aṭanga chhuakin, White House-ah a inenkawl zui dawn a ni.