Trump-a'n Hamas lam ṭangah Biden a puh

US president hlui leh kumin kum tawp an inthlan tura Republican presidential candidate tur, Donald Trump chuan US president Joe Biden-a'n Israel-in Rafah a rûn a nih chuan ralthuam pek loha a vau thu a sawi chu Biden-a'n Hamas lam a ṭan tih tichiangtu a nih thu a sawi.

Trump chuan,"Joe hian helpawl lam a ṭang a ni, college campus-a Palestinian thlawptu zirlai lungawi lote lam a ṭang ang chiahin" a ti. Biden hian a lo hre chiang lo a nih chuan, Hamas-te chuan pawisawi lo civil mi sang tel an that a, nausente pawh an zuah lo a, an mi hren mek zingah pawh America mite an tel a ni, tiin a sawi zui.

US-a campus zirlai nawrh huaihawtte chu 'Firfiakte thlawptu mipui' tiin Trump chuan a sawi bawk a, Biden-a donor-te chuan sum pawh an pe niin a puh. Biden chu Israel-in an mamawh ber laia thlahthlamah puh bawkin a chet dan chu mi tam takin mak an tih thu a sawi. Israel-in an ram venhim nana an mamawh ralthuam pek loha a vau laia Israel lam ṭang angin Biden chu insawi tawh lo se a duh thu Trump chuan a sawi bawk. President la ni se chuan Ukraine leh Gaza-a indona hi a chhuak lo ang , a ti. Biden chu hruaitu chak lo, eiru nasa tia puhin, khawvel chu Indopui III-na lamah a hruai a ni, tiin a sawi.

Biden hian kar liam ta khan Israel tana 1,800 2,000-pound (907 kilogram) bomb leh 1,700 500-pound bomb thawn chhuah tumna chu a dang a, Israel hian Rafah hi a bei tak tak a nih chuan Israel sipaite tana ralthuam an thawn luh ṭhin chu tihtawpah a vau a ni.

Israel sipai thupuangtu, Rear Adm. Daniel Hagari chuan Rafah an beihna tur ralthuam chu Israel chuan an nei niin a sawi ve bawk. Hagari hian Israel-in a thiltum tihhlawhtlin nan leh Rafah rûn a tumnaa a hman tur ralthuam chu an nei ngah tawk tih a sawi a, US leh Israel inkar chu a ṭhat thu sawiin ram pahnihte'n thu inhmuh lohna an neihte pawh dawhkan khat kila chinfel theih a nih thu a sawi bawk.