Palestinian thlawptute'n Eurovision-a Israel tel dodal

Sweden-a tuipui kam khua, Malmo-ah Ningani khan Palestinian thlawptu mi eng emaw zat pung khawmin, Eurovision song contest-a Israel tel an duh lohna leh dodalna an lantir.

Malmo-a pung khawmte hian Palestine flag-te kengin, Palestine chu la zalen tur a nih thu leh Israel chu ram hlauhawm tak a nih thute an tlangaupui a, Palestinian flag rawng milin meikhute an chhuah bawk a ni. Palestine thlawptu mipuite hi Stortorget square-ah pung khawmin, eurovision song contest-a Israel tel chu an pawm theih loh thu sawiin, Gaza-a indona chu tawp tawh se an duh thu an sawi tel bawk. Police lamin an tarlan danin Palestine thlawptu pung khawmte hi mi 10,000 aṭanga 12,000 vel an tlin an rin thu an sawi a ni. Eurovision-a Israel a tel chhunzawm dodaltute chuan kum 2022-ah pawh Russia-in Ukraine a rûn avangin ban an ni tawh a, an rama sorkar tlukchhiat avangin Belarus pawh ban an lo ni tawh bawk niin an sawi.

Eurovision contest buatsaihtute lam erawh chuan intihsiakna aṭanga Israel ban tura nawrna hi an bengkhawn lo thung. Hetih lai hian Israel chu an hla thu thlak turin an hriattir tawh a, Eurovision-a Israel-in an hla thua an hman hi October 7-a Hamas-in an beihna denchhen a, October Rain tia phuah niin an ngai a ni. October rain hi Hurricane tiha thlak a ni tawh a ni.