Putin-a'n Prime Minister atan Mishustin ruat nawn

Russia President thar atana lak luh a nih leh hnuah, Vladimir Putin chuan prime minister atan Mikhail Mishustin a ruat nawn leh. Kum 58 mi technocrat hian a zawnin term hnih prime minister dinhmun hi a chelh dawn ta a ni.

Mishustin hi President Putin ṭhianṭha leh a tana rinawm tak a ni a, President term ngana chelh tura Putin lak luh a nih pawh khan Mishustin bawk hi PM atana ruat rin lawk a lo ni tawh a ni. Mishustin hian PM term kum li a hmang zo tawh a, hemi chhung hian media interview a nei khat hle a, Russia-Ukraine war chungchangah a ngaihdan pawh vantlang hriatah puan chhuah a ni ngai meuh lo a ni.

Parliament lower house speaker, Vyacheslav Volodin chuan Putin hian State Duma hnenah PM atana Mishsutin a ruatna hi a theh lut tawh a, Duma hian a lo pawmpui ve leh phawt a ngai dawn a ni. PM atan pawm a nih hnuah a cabinet member tura a ruatte a theh lut ve leh dawn a, mahse, tam tak chuan Putin hian a cabinet ngaite bawk a ruat chhoh leh an ring.