Israel-in Rafah chhuahsan tura hriattirna tih chhuah belh

Israel sipaite chuan Gaza Strip chhim lam, Rafah beih chhunzawm zel a tum avangin Palestinian mi awmte chu Rafah chhuahsan turin hriattirna a tih chhuah belh leh.

Rafah khawchhak lam district-a chengte tan an awmna hmun chhuahsan tura hriattirin lehkhate an thlak bakah, social media lamah pawh post an siam bawk. Civil mite hi Rafah hmar thlang lam, 'humanitarian zone' tia an sawi, tuipui kama al-Mawasi lama insaseng turin an hriattir a ni. Kar liam ta Thawhṭanni khan insawnchhuak tura hriattirna hi a lo tichhuak tawh bawk a, Inrinni thleng khan Rafah aṭang hian Palestinian mi nuai 1.5 vel chu an inthiar chhuak tawh niin United Nations Relief and Works Agency for Palestinian Refugees in the Near East (UNRWA) chuan a sawi a, Israel chuan nuai 3 vel an tling tawh niin a sawi thung.

US leh a thawhpui ram dangten Rafah-a beihpui thlakna kalpui lo turin nawr reng mah se, Israel chuan a lo ruahman lawk tawh angin Hamas firfiakte laka beihpui thlakna chu kaltlangpui a tum tho tih a sawi.

Gaza Strip-a inkahhai puan a nih theihna atan hian hma lak reng ni mah se tun thlengin inremna an la siam thei lo. US president Joe Biden chuan Hamas hoin Israel an beih ṭuma an mi man, an hren mekte chu an chhuah a nih chuan a tuk maiah Gaza-ah inkahhai hi puan theih a ni ang, a ti. 'Israel chuan inkahhai puan a nih leh nih loh chungchang hi Hamas kutah a awm tih an sawi, an duh a nih chuan naktuk maiah pawh indona hi kan titawp mai thei dawn a ni," a ti.

Israel Defence Forces (IDF) chuan Rafah-ah hian beihpui thlakna lian tham takin a la kalpui lo a, mahse sipaite erawh chu Rafah-ah hian an lut tawh a, Hamas fighter-te nen inhmachhawnin an inbei tawh niin an sawi. Hei bakah lei hnuaia Hamas ho bihrukna hmun siam eng emaw zat an hmu chhuak tawh tih an sawi bawk.