Nepal SC-in Mt Everest lawn thei zat bituk turin a hriattir

Nepal Supreme Court chuan an rama Mt Everest leh tlang dang lawn thei zat tur bituk turin sorkar a hriattir. Nepal hi khawvela tlang sang zual 10 zinga pariat awmna a nih avangin tlang lawn mite chuan khaw nawm lai chuhin an pan nasa ṭhin hle.

Nepal Supreme Court hian April khan thutlukna hi siam tawh mah se tunhnaiah an thutlukna khaikhawmna hi hriat a ni chauh a ni. Lawyer Deepak Bikram Mishra chuan SC hian tlang lawn thei tura permit pek chhuah zat bituk tura sorkar a hriattir thu sawiin, tlangram environment humhalh bakah bawlhhlawh sawng bawl ṭha tura hriattirna pawh tihchhuah a nih thu a sawi bawk.

Nepal sorkar hian Mt. Everest lawn tura dilna lutte chu a zavaiin a pawm ṭhin a, tlang lawn man USD 11,000 an chawi a ngai ṭhin thung.

Nikum khan Everest lawn phalna permit 478 a pe chhuak a, hei hi permit pek chhuah tam ber kum a ni. Nepal sorkar hian kumin atan tlang lawn phalna 945 an pe chhuak tawh a, heng zinga 403 chu Mt Everest lawn phalna an ni. Lawyer Mishra chuan Nepal rama tlangte chu mihringin an chim buai hneh lutuk tih sawiin, an rama tlangte chu dimdawih an ngai hle tih a sawi.

Supreme Court hian tlang lawn thei zat bituk tura sorkar a hriattir bakah chhiat tawk chhanchhuah ngaite chhanchhuah nan chauh helicopter tlang lama hman tur a ni tih a sawi bawk. Nepal Mountaineering Association president Nima Nuru Sherpa chuan court thutlukna chuan khualzin leh tlanglawn lama an sum lakluh a nghawng dan tur a la chiang lo tih sawiin, permit engzat nge pek chhuah a nih ang tih chuan a ngawng dan tur a tichiang dawn niin a sawi.