Indonesia-a khuarel chhiatna vangin mi 28 an thi

Indonesia chuan khuarel chhiatna an tawk a, sabereka-khuang-kaih leh tlang aṭanga lava vawt luang vangin mi 28 in nunna an chan tawh bakah mi tam tak chin hriat lohin an awm mek a ni.

Basarnas search and rescue agency chuan Inrinni liam ta khan ruahsur nasa in sabereka-khuang-kaih a thlen thu leh, Marapi tlang aṭanga lava vawt luang avangin West Sumatra province-a Agam leh Tanah Datar district-te chuan chhiatna an tawh thu nimin khan a puang.

Abdul Malik, provincial rescue agency hotupa chuan mi 28 in nunna an chan tawh tih tarlangin, heng zingah hian naupang leh hmeichhia pawh an tel tih a sawi. Agam district-ah mi pali zawn lai mek an la nei a, district pahnihah mibo zawn hna an kalpui chhunzawm zel dawn tih a sawi tel bawk.

Thuneitute chuan district pahniha hmun eng emaw zatah chhiat tawkte dah lailawkna tur an siam a, hemi bakah hian mi bo zawng turin chhanchhuah hna thawktute leh rubber hmanga siam lawng an tir chhuak bawk. Indonesia-ah hian kar liam ta khan South Sulawesi-ah leimin leh tuilian vangin mi 15 in nunna an lo chan tawh bawk a, in eng emaw zat a tihchhiat bakah kawng pawh a tichhe tel a ni.