Hamas-in Joe Biden thusawi an dem

Gaza Strip-a Israel nena indo mek, Palestinian firfiak pawl Hamas chuan inkahhai puan chungchanga US president Joe Biden thusawi dan chu an dem thu an sawi.

President Joe Biden hian Seattle-a thu a sawinaah, Hamas-hoin an mi hrente an chhuah chuan Gaza-ah inkahhai puan a ni thei chauh dawn tiin a sawi a ni. A thusawi chungchangah hian Hamas chuan thuchhuah an siam nghal a, 'Keini Islamic Resistance Movement chu US President Joe Biden thusawi danah hian kan lawm lo hle a ni. US President-in hetiang zawnga thu a sawi hi kan dem a, inbiakna neih meka palai hna thawktu, Egypt leh Qatar-te rawtna hnawlna leh, inremna siamna kawng dal theitu zawkah kan ngai," tiin an tarlang.

Hamas chuan,'Inkahhai puan a nih theihna atan theihtawp kan chhuah a, mahse, firfiak (Israel Prime Minister) Netanyahu leh a cabinet-te chuan he hmalakna hi a ni lo zawnga kalpuiin, Rafah, Jabalia leh Gaza-a kan mite chungah beihpui an thlak a ni," an ti. Israel-in Gaza beih chhunzawm a tumna chuan Benjamin Netanyahu-a'n Gaza Strip mipui suatna tura indona kalpui zel a tumzia leh, Israel mi tang mekte nunna a ngaih pawimawh lohzia a tilang a ni, tiin an sawi bawk.

President Biden pawh bei chhunzawm lehin, "Nazi Zionists (Israel)-te pawikhawihna policy US-in a thlawpzia a rawn lantir a ni," an ti. Gaza-a Palestinian mite beihna turin US chuan Israel chu a hum bakah, sipaite ṭanpuina pawh a pe chhunzawm reng a ni, an ti.

New Israel Fund-in Palestinian-te tan USD 750,000 tuak chhuak

Gaza Strip-a indona thleng mek tuartu, Palestinian civil mite tan New Israel Fund chuan USD 750,000 an hmu chhuak tawh tih an sawi.

He hmalakna hi Juda-te holiday, Passover hma deuh khan an kalpui ṭan a, Israel bakah ram dang - US, Canada, UK leh Germany bakah ram dang eng emaw zat aṭangin donation hi an thawh khawm a ni. Israel ram chhung bikah New Israel Shekel (NIS) mtd 2 vel an hmu.

Sum hmuhte hi Gaza-a chhawmdawl hna thawktu, World Central Kitchen leh International Rescue Committee te puihna atan pek a ni ang.