Afghanistan-ah tuilian vangin mi 300 chuang thi

Afghanistan hmar lama tuilian avanga thi chu 315 an tling tawh a, mi 1,600 chuang an hliam bawk.

Kar liam ta Zirtawpni aṭang khan Afghanistan ram chhung hmun hrang hrangah ruah nasa takin a sur a, hei hian hmun tam takah tuilian a thlen a ni. Afghanistan-a rorel lai, Taliban sorkara ministry of interior affairs chuan Inrinni khan tuilian avang hian mi 150 vel an thih thu a sawi hnuah, ministry of refugee chuan Pathianni khan mi 315 an tlin tawh thu hi a rawn sawi ve leh a ni.

World Food Programme (WFP) pawhin thi hi mi 300 chuang an ni tawh tih sawiin, chin hriat lohin mi tam tak an awm mek tih a tarlang. Chhiatna thleng tuar nasa ber chu Baghlan province niin, chenna in 1,000 chuang a chhia a ni. UN agency chuan tuilenna bial hrang hrangah ei tur an sem mek a ni. Baghlan bakah hian Badakhshan, cental Ghor leh Herat-ah pawh chhiatna a thleng nasa hle.

Taliban ministry of defence chuan tuilenna hmun ṭhenkhata mite chu hmun him lamah sawn chhuah niin, hliam tuar mi 100 chuang chu military hospital-ah dah an ni tawh tih a sawi a, mahse, eng province-a mi nge tih erawh a sawi lang lo. Tuilenna bial hrang hrangah hian state of emergency puan a ni tawh a, ei tur, damdawi leh mipui mamawh dangte an sem mek tih an sawi.