North Korea-ah lipstick senlar inhnawih khap

Kim Jong-un rorelna hnuaiah North Korea ramah hian khapna hrang hrang siam a ni fo a, heng zingah hian fashion lamte pawh a tel. Fashion leh cosmetics brands lar tak takte khap niin, hremna pawh na taka siam a ni tawh a, tun hnaiah sorkar chuan lipstick senlar inhnawih a khap leh.

Rawng senlar hi Communism nen hian tun hma aṭangin inzawmna lo nei tawh ni mah se, North Korea hotu lu ber hian Communist ni loin, capitalism symbol anga a ngaih avangin lipstick senlar hi a khap thar leh ta a ni. Hei bakah hian hmeichhiain lipstick senlar tak a inhnawih chuan an langsar hmain, sorkarin lan danah tluangtlam leh zahawm taka kalpui tura a tihna chu a kalh thei nia ngaih a ni. Hmeichhiate chu makeup pawh nasa taka inhnawih phalsak an ni lo bawk.

North Korea hian mimal lan dan chungchangah hian lipstick chauh lohah pawh khapna a lo siam tawh. Tun hnaiah Kim Jong-un kaihhurai sorkar hian jeans tight tak, skinny jeans, body piercing leh hairstyle thlengin khapna a lo siam tawh bawk. Hairstyle pawh mipa tan a chung lam buk, a sir kawlh/kheng deuh hleka meh, mullet leh hmeichhia tan sam sei chiah phalsak an ni. Jong-un a hak ṭhin, trench coat dum pawh midangin an hak khap nia sawi a ni bawk a, fashion lama khapna an siamte hi mipuite'n an zawm theihna turin endiktu, fashion police 'Gyuchaldae' tih an awm a ni. Khapna zawm lote hi hrem emaw, pawisa chawitir emaw theih a ni a, an thawmhnawte pawh an hak chhunzawm tawh loh nan zai chhiatsak theih an ni bawk.