US Senator-in Gaza-a nuclear bomb hmang turin Israel a ràwn; Israel bomb mamawh angte pe turin a phût bawk

US-a Republic senator Lindsey Graham chuan Gaza Strip-a Israel-Hamas indona thleng mek chungchangah Israel chu Gaza-a nuclear bomb hmang tura rawnin, indona thleng mek tihtawp a nih theihna turin Israel-in bomb a mamawh angte chu pek a ni tur a ni, a ti. A thusawi hian sawi zui a hlawh hle.

South Carolina Republican Senator hian NBC News-in a kawmnaah he thu hi a sawi chhuak a, Israel-Hamas indona thleng mek chu Indopui II-na titawp tura US-in kum 1954-a Japan-a Hiroshima leh Nagasaki-a atom bomb a thlak nen khaikhinin, US chuan thutlukna dik tak a siam a ni tiin, hetiang bawk hian Israel chu Gaza-a nuclear bomb hmang turin a rawn zui a ni.

Gaza indona tihtawp theihna turin Israel bomb mamawhte chu pe turin a ti bawk a, Israel chu tlawm thei an ni lo a, thihna thlengte tihtlem a nih zawk theihna turin Israel chu thawhpui a ngai a ni, a ti. 'America-in Hiroshima leh Nagasaki-a nuclear bomb pahnih a thlak chu eng vangin nge a dik bik ang? Israel tan, in ram dam chhuahna tura in tih ngai apiang chu ti rawh u," tiin a sawi zui.

Senator hian US secretary of state Antony Blinken-a'n Israel-in Gaza beihpui a thlak chu America-in a duh lo hle tih a sawi hnuah he thu hi a sawi a ni. US leh a thawhpui khawthlang ram dangte'n vawi eng emaw zat warning an pe chungin, Israel hian Hamas firfiakte la inkhuarna hmun nia a sawi, Gaza chhim lama Rafah khawpui chu a beih ṭan a ni.

Graham hian Gaza-a civil mi tam tak thihna thleng chungchangah Hamas chu a mawhpuh bawk a, 'Hamas-te hian himna tura an mipuite inphenna atana an hman chhung chuan civil mite thihna thleng hi pumpelh theih a ni lo a ni. Indonaa Hamas-te'n civil mite dinhmun hlauhawm taka an dintir anga zak lo taka thiltih ang hi ka hmu ngai lo," tiin a sawi bawk.

Tun hma lam pawhin Graham hi sawi zui hlawh tak takin a lo ṭawng chhuak tawh ṭhin a, nikum December thla pawh khan US president Joe Biden chu khawvel map aṭanga Iran nuai bo turin a lo ti tawh a ni.