US-in Russia aṭangin uranium a la lut tawh dawn lo
US president, Joe Biden chuan Russia aṭanga uranium lak luh tawh lohna tur dan an siamah a hming a ziah hnan tak avangin, US chuan ni 90 hnuah Russia aṭanga Uranium an lak luh ṭhin a titawp dawn. Hei hi Russia-in Ukriane a beihna US-in a dodalzia lantirna pakhat atana tih a ni.
US-a nuclear power plant-te'n uranium an hman 24% zet hi Russia aṭanga lak luh ni mah se, ni 90 hnuah a tawp tawh dawn a, hetih lai hian Department of Energy chuan uranium an indaih lo nia an hriat chuan he khuahkhirhna dan hi a dang thei dawn nia tarlan a ni. Dept. of Energy-in khuahkhirhna dan hmang lo tura thutlukna an siam chuan Russia aṭangin kum 2027 thleng a ngai angin uranium lak luh chu kalpui chhunzawm a ni ang.
National Security Adviser, Jake Sullivan chuan nuclear deh chhuah nana Russia laka an innghahna chuan ziaawm lam a pan zel a beisei tih sawiin, President thutlukna chuan power-a US intodelh nan a puih ngei a beisei tih a sawi. Sullivan hian US ṭhian ṭha; Canada, France, Japan leh United Kingdom-te chuan ṭangrualin Uranium hman theiha sawngbawlna tihchangtlun nan USD tld 4.2 hman an tum thu a tarlang tel bawk.
Anatoly Antonov, Russia ambassador chuan US thutlukna chuan khawvel insumdawn tawnna kawngah nghawng ṭha lo a nei dawn tih sawiin, Russia laka a thil tum chu hlawhtlin phah dawn lo tih a sawi bawk. US thutlukna avang hian Russia ram sum leh pai dinhmun chuan a tuar lutuk dawn lo tih a tarlang tel bawk.