A nupui thattu, Kazakhstan minister hlui kum 24 tang dawn
Kazakhstan Supreme Court chuan an ram economy minister hlui, Kuandyk Bishimbayev chu a nupui nghaisa leh tihhlum puhna thubuai siamsakah thiam loh chantirin, kum 24 jail tang turin a hrem.
Kuandyk Bishimbayev thubuai hi kar sarih chhung ngaihtuah niin, thubuai ngaihtuah lai hi TV lamah pawh live-a pek chhuah a ni. Hetianga live-a pek chhuah hi sorkarin mi pawimawh leh dinhmun sang taka dingte pawh dan chungah an awm bik lo tih mipuite hnena hriattirna tura a tih vang a ni pakhat a ni.
Thubuai ngaihtuahnaah hian nikum November 5 khan kum 51 mi, Bishimbayev-a'n a nupui, kum 31 mi Saltanat Nukenova chu an rama khawpui lian ber, Almaty-a an chhungkaw restaurant-a VIP room-a a hnek leh pet lai te, a samah a hnuk lai, surveillance footage pawh tihlan a ni bawk. A nupui hi suite-ah a hnuh luh hnu hian a thi zui a ni. Bishimbayev hi kum 2018 khan eiruk thubuaia thiam loh changin kum 10 tang tura hrem a lo ni tawh a, mahse, kum thum pawh a tan hmain ngaihdam a ni a, jail aṭangin a chhuak leh nghal a ni.