Singapore-in Prime Minister thar la lut dawn

Singapore chuan kum 20 hnuah vawiin hian Prime Minister thar, Lawrence Wong lak luhna hun an hmang dawn. Lawrence Wong hi kum 51 mi, Finance leh Deputy Prime Minister ni lai a ni.

Lawrence Wong hian Prime Minister ni lai, Singapore Prime Minister hmasa ber, Lee Kuan Yew fapa upa ber Lee Hsien Loong a thlak dawn a, Lee Hsien Loong hian kum 2004 aṭang khan Prime Minister hna hi a chelh a ni. 4G an tih, Singapore ram hruaitu chhuan lina an tih zinga Lee thlak tura thlan chhuah niin, April 2022 khan thlan a ni tawh a ni.

Singapore hian 1965-a zalenna, ram anga kum 59 chhung mahni a inrelbawl tawh chinah Prime Minister pathum chiah a la nei a, Wong hi Prime Minister palina tur chiah niin, Prime Minister hmasate ang thoin People’s Action Party (PAP) member a ni bawk. Singapore parliament-ah hian member 98 awmin, kum 2020-a an ram inthlan hnuhnung berah khan PAP hian vote tla zawng zawng aṭanga 61% aia tam an hui a, seat 88 an la a ni. Tuna sorkar kal lai term hi nakuma tawp tur ni mah se, kuminah hian inthlanpui an nei dawn niin observer-te chuan an sawi.