NKorea-in Congress khar nan rally huaihawt

North Korea-a rorellai, Workers' Party Congress chu nimin khan an zo a, Congress khar nan hian an ram khawpui Pyongyang-ah rally ropui tak an huaihawt zui nghal a ni.

Rally hi Pyongyang ceremonial square-ah neih a ni a, tel an ṭhahnem hle. Square-a mipui pungkhawmte hian pangpar, flag leh balloon rawng sendang kengin an party slogan-te an aurual pui a ni. Rally hi North Korea ram hotu, Kim Jong un leh sipai official-ten an hmanpui a ni.

Ṭum dang ang lo takin nimina rally neihah hian foreign journalist pawh eng emaw zat an tel. Workers' Party Congress neihnaa tel tur hian foreign journalist 100 chuang chu visa pek an ni a, mahse meeting neihna hmunah tak erawh chuan tlemte chauh luh phalsak an ni thung. Foreign journalist-te hi uluk taka vil reng an ni a, Congress-a tel tura sawm ni mah se a hmunah tak chuan minute nga vel bak awm phalsak an ni lo. BBC journalist chu an ram hruaitu leh an rorel dan system-te a report danah official-te an lungawi loh avangin darkar riat zet thu an zawhfiah hnuah an ram aṭangin an hawtir a ni.

Congress-ah hian Kim Jong un chu Workers' Party of Korea (WPK)-a post thar, party chairman nihna siamsak a ni. A hma chuan party hotu ni mah se a post hi first secretary tih a ni. WPK Standing Committee of the Political Bureau member thar pahnih thlan a ni bawk a, anni nen hian committee member hi panga an awm.

WPK chairman nihna pek, Kim Jong un hian nihna dang pawimawh a ngah hle a, central military commission chairman, national defence commission chairman leh Korean People's Army supreme commander a ni mek bawk.

Party Congress-ah hian Kim Jong-un chuan kum nga chhung atana economic plan a pharh a, hei hi kum tam tak chhung chu an ram hian an ti tawh ngai lo a ni. Mahse a ruahmanna siamte erawh tlemte chauh puanzar a ni.