Philippines President thlannaah Duterte a chak

Philippines ram President thar tur thlanna neih zawh takah result chu official-a puanchhuah la ni lo mah se, Davoa city mayor Rodrigo Duterte chu a chak tih hriat a ni tawh.

Thawhṭanni-a President thlannaah hian vote nei mi maktaduai 55 vel an awm a, vote tla hi 81.62% a tling niin Commission of Elections chuan a tarlang.

Duterte hi Philippines chhim lam, Mindanao bial aṭanga president ni thei hmasa ber a ni dawn a ni. Mindanao bial hi a leilung hausa hle mah se, sor≠karin a ngaihsak ṭha tawk lo a, hei bakah hian hel an tam hle bawk. Duterte hian chhim lam bial tan hmasawnna a thlen ngei beisei a ni.

June 30-a a term tawp tur, President Benigno Aquino III thlaktu tur thlannaah hian candidate panga an awm. Inthlan hmaa mipui ngaihdan lakah pawh Duterte hian hma a hruai reng ṭhin. Duterte thupuangtu chuan sorkarin sipai chakna hmanga chhim lam biala helpawl a beihte chu inremna siampui dan kawng an zawng dawn tih a sawi a, hei bakah hian an rama US-style system sorkar kalpui chu parliamentary leh federal model-a thlak a tum dawn bawk niin a sawi.

Kum 71 mi, Davoa mayor hian mayor a nih chhungin Davoa khawpui≠ah pawikhawihna thleng ṭhinte khuah≠khirhna turin dan khauh tak a siam a, he khawpui hi Philippines rama khawpui him ber zingah a siam thei nia sawi a ni. Kum 22 zet Davoa mayor a nih chhungin eirukna leh hlemhletna umbo tumin a bei nasa a, official eirute chu an thih loh pawhin chawlhtir mai an duh tih a sawi. Hei bakah hian pawikhawihtute chunga police-te an che na viau a nih pawhin a thlawp thu a sawi. "Misualte chuan an lo bei let cheu a, an inpe duh lo a, in nunna atan hial a hlauhthawnawm a nih chuan kap mai rawh u" a ti. A thawm na tak leh ṭawngkam dengkhawng tak takte avangin sawisel tawk fo mah se, heng avang hian thlawptu tam tak a neih phah a ni.