US President atan Trump aiin Clinton

US President thar thlang turin thla ruk a la awm a, America mipui≠te ngaihdan lak hnuhnung berah chuan President atan hian Donald Trump aiin Hillary Clinton-i duhtu an tam zawk.

Party president candidate tur zawnna, primary election chu zawhfel la ni lo mah se, Republican party president candidate Donald Trump chuan a khingpuite a inhnuhdawh vek avangin party nominee turin a chiang tawh a ni. Democratic party lamah tihchian la ni lo mah se, Hillary Clinton-i hi amah hnaih bertu Senator Bernie Sanders chuan a umphak thei rin a ni tawh lo bawk.

Thawhlehni-a tihchhuah, Public Policy Polling (PPP) survey-ah president atana Trump duhtu hi 34% awmin, a duhlotu 61% an awm. Hillary Clinton-i duhtu hi 36% an awm laiin a duhlotu 55% an awm bawk a ni.

Donald Trump hi a campaign laia a thusawi dengkhawng tak tak avangin sawisel a hlawh zui hle. President a nih chuan US-a Muslim lut tur dan a tum thu a sawi chu an party chhungah pawh sawisel a tawk nasa a, rampawn lam hruaitute pawhin an sawisel a ni. Tunhnaia New York Times-in a kawmnaah, Trump chuan Muslim dan a tumna chu a la ngai reng tih a sawi a, mahse hemirual hian London Mayor atana Muslim mi thlan tlin tak, Sadiq Khan erawh chu he khapna hi a huamtir ve dawn lo tih a sawi. London mayor atana Khan a tling chu lawm≠awm a tih thu sawiin, "Muslim mite khapna tura rawtna ka siamah khan ngaihnathiam chin chu an awm thei zel dawn a ni" a ti.

Hei hi chhangin, Khan chuan Trump-a rawtna chu a pawm lo tih a sawi. "Hei hi keima chungchang bik a ni lo. Ka chhungte, ka ṭhian≠te leh khawvel hmun tina kan sakhua ang zuitute chungchang a ni" tiin, Islam chungchang Trump-a ngaihdan mak tak chuan Muslim mite dinhmun a tihim lo thei tih a sawi.