Nepal atangin Everest tlang lawn leh ta

Sherpa-te chuan Nepal lam aṭangin khawvela tlang sang ber, Mount Everest chu an lawn ṭan leh ta a, hei hi kum hnih chawlhsan a nih hnua an lawn lehna hmasa ber a ni.

Official-te chuan Sherpa pakua-te chuan Nilaini khan meter 8,850 (feet 29,035)-a sang an thleng tawh niin an sawi.

May thla hi Everest tlang lawnna hun ṭha ber a ni. Kum hnih liamtaa an rama lirnghing vanga chhiatna nasa tak thleng avangin Nepal lam aṭanga tlang lawn hi an reh phah a ni. Lirnghing hian vur tawlh nasa tak siamin tlang lawn mi 18 in an thih phah a, kum 2014 khan vur tawlh vangin Sherpa 16 an thi bawk.

Nepal Mountaineering Association President Ang Tshering chuan sherpa-te hian hma takah tlang chhip lawn chhuah tum mah se, tlang chhip thlen hma meter 70, Hillary Step bul chu kal a harsat avangin an ruahman aiin hun an hmang rei ta zawk niin a sawi.

Kum hnih zet an ram aṭanga Everest tlang lawn chawlhsan a nih hnuin Nepal thuneitute chuan tlawng lawn mite chu Everest-a lawn leh tur hian an sawm a, kum hnih kaltaa permit an lo pek chhuah tawhte pawh an pawmsak bawk a ni. Department of Tourism chuan Nepal ram aṭanga tlang lawn mi, ramdang mi 700 zet an awm tawh niin a sawi.

Kuminah hian Nepal sorkar chuan a vawikhatna atan tlang lawn mite hmanrua, hrui leh mamawh dangte chu helicopter hmanga thiar a remti bawk. Heng hmanruate hi a hma chuan Sherpa-te hian an kensak ṭhin a, mahse lirnghing avanga Khumbu Icefall a hlauhawm zual tak avangin helicopter hmanga dah phalsak a ni tawh dawn a ni.