Venezuela-ah eptuten kawng zawh

Venezuela President Nicolas Maduro duh lohna lantirin an ram khawpui, Caracas-ah eptuten kawng an zawh a, National Guard-te nen an innawr buai.

Eptute hian election commission headquarters panin kawng an zawh a, sipai leh police-te chuan lo dangin, mipui pungkhawmte hnawhdarh nan tear gas-te an hmang a ni.

Tun thla tir lam khan eptute hian President Maduro-a paihthlak a nih theih nana signature campaign an neihah signature maktaduai 1.85 an lakhawm chu sorkarah an theh≠lut a, president paihthlakna tur kalpui thuai turin an nawr bawk.

Caracas-a kawngzawh hi Democratic Unity Roundtable party huaihawt a ni a, hruaitu langsar tak tak pawh an tel. President candidate hlui leh Miranda state governor, Henrique CApriles pawh telin, police-te hian a mit-ah tear gas hi an phuhsak niin a sawi.

Hetihlai hian sorkar lam chuan kawngzawh huaihawt turin eptu lamte hi phalna pek an ni lo tih a sawia, National Assembly speaker Henry Ramos Allup chuan police-te hian rubber bullet hmangin kawng an lo dang a ni, a ti.

Venezuela ram hian sum lamah harsatna lian tak a tawk mek a, hei eptute chuan President ṭanglai Maduro leh a thlak tak, Hugo Chavez-te socialist policy vanga thleng niin an puh. Hei vang hian president paih≠thlak a nih theih nana mipui vote lak an phut a ni. Venezuela ram danpui hnuaiah president ṭanglai hian an term chanve an hman tawh chuan, mipuite vote lak, referendum hmanga paih thlak theih a ni. Mahse referendum buatsaihah hian president paihthlak duhtu lamah hian inthlan laia president-in vote a hmuh zat emaw, a aia tam emaw a tlak a ngai thung.