Brazil President Rousseff-i suspend Acting President atan Michel Temer la lut

Brazil upper house, Senate chuan budget chungchanga dawt sawia puh, Dilma Rousseff-i President aṭanga ban a nih tur leh tur loh chungchang rei tak a ngaihtuah a chungthu ngaihtuah a nih theih nan ni 180 chhung atan suspend a remti ta.

Dilma Rousseff-i hian kum 2011 aṭang khan President din≠hmun hi chelh tawhin, Brazil rama hmeichhe presiden ni thei hmasa ber a ni a, kum 2014 inthlan dawn khan a term hnihna a chelh nawn theih nan an ram budget chung≠changah dawt a sawi nia puh a ni.

Parliament lower house chuan President hi thubuai siamsak a nih theihna atan ban a lo remti tawh a, hemi hnu hian Senate hian a ngaihtuah ve leh a ni. Senate hian darkar 20 chhung zet a ngaihtuah hnuah vote lain, member 55 chuan president suspend hi an remti ta a, a duh lo lamah vote 22 a tla.

Rousseff-i chuan President a nihna aṭanga ban a nih dan chu phiarrukna avang a ni tih a sawi a, "Mipuiten an aiawh tura an thlan president chu a thiltihsual ni miah loh avanga suspend a nih chuan, sawiselna avang ni loin phiarrukna avanga paihthlak a ni tihna zawk a ni" a ti. Thil tihsual chu a nei ngei a, mahse dan kalh zawnga pawikhawihna eng thil mah a tih loh thu a sawi. Amah an phiarruka chu a theih anga beih let zel a tum thu a sawi.

Budgertary law palzuta puh a nih chungchangah Dilma Rous≠seff-i hi chhui a ni dawn a, hemi chhunga an ram president lailawk hna chu vice president Michel Temer-an a chelh dawn a ni. Temer hian a hmain Rousseff-i kaihhruai ṭangrual sorkar a thlawp a, mahse March thla khan sorkar a thlawpna hi a hnukdawk a, Rousseff-i chuan phatsantu leh amah phiarrutu-ah a puh hial a ni.

Kum 75 mi, Temer hian a cabinet thar turte pawh a puang nghal a, finance minister atan central bank hotu hlui Henrique Meirelles a dah a, an ram economy siamṭha tura theihtawp an chhuah tur thu a sawi. An ram humhim tura sorkar an siam tur thu a sawi. Cabinet member atan mi 22 a ruat a, an zingah hian hmeichhia an awm lo. Midang pahnih ruat belh leh a la tum a ni.