Donald Trump-a'n office kal chhunzawm tawh

US president Donald Trump chu Covid-19 a kai tih hriat chhuah a nih aṭanga kar khat pawh a liam hma, Nilaini aṭang khan Oval Office-ah hna a thawk chhunzawm leh tawh a ni. 

US president Donald Trump leh a nupui first lady, Melania Trump chu  October 1 khan Covid-19 hri an kai tih hriat a ni a, October 2 khan Trump chu Bethesda, Maryland-a sipai damdawi-in, Walter Reed National Military Medical Center-ah enkawl tura dah luh a ni. 

Walter Reed military hospital-ah ni li leh zan thum enkawl a nih hnuin October 5 khan damdawi-in aṭangin a chhuak a, White House-ah a inenkawl chhunzawm dawn a ni. October 7 khan Trump chuan a dinhmun ngaihtuahawm a awm loh avangin office a kal thu hi a sawi. 

Trump chuan hna a thawh ṭan hmain a office kawtah thu a sawi a, ngaihtuahawm a nih loh thu leh a dinhmun ṭhat thu sawiin, hri a kai chu Pathian malsawmna zawk nia a ngaih thu a sawi. Trump chuan amah an enkawl dan anga America mi zawng zawngte pawh enkawl theih ni se a duh thu a sawi a, Biotechnology company, Regeneron Pharmaceuticals-te damdawi siam chu a thlawna sem chhuah tum a nih thu a sawi bawk. 

Trump chuan damdawi-in a awm laiin antiviral drug, Remdesivir damdawi hmanga enkawl a nih thu a sawi a, hei bakah hian anti-inflammatory drug, dexamethasone hmanga enkawl tel a ni bawk tih a sawi. Heng damdawi pahnih bakah hian Regeneron Pharmaceuticals company siam chhuah, experimental antibody cocktail hmanga enkawl a nih thu Trump chuan a sawi bawk a ni. 

Trump doctor, Sean Conley chuan Trump-a'n physical exam a neih tawh zawng zawng chu a ṭhat thu leh, oxygen pawh a ngaih loh thu a sawi a, khawsik pawh ni li chhung a neih tawh loh bakah darkar 24 chhung chu amahah Covid-19 hri lanchhuahna engmah a awm loh thu a sawi. Hei vang hian a dinhmun chu a ṭhat hle thu Trump chuan a sawi.