Rafah beihna thleng lehin inbiakna a tibuai : Qatar PM

Gaza indona tihtawp lailawk a nih theih nana inkahhai puang tura inbiakna neih chu Israel sipaite'n Rafah khua an beih lehna chuan a tibahlah niin Qatar prime minister Mohammed bin Abdulrahman Al-Thani chuan a sawi. Gaza Strip hmun hrang hrangah tun hnai hian inbeihna tharthawh leh a ni a, Palestinian tam tak Gaza aṭanga sawn chhuah belh an ngaih phah a ni.

Gaza chhim lam Rafah bakah Northern Gaza leh central Gaza-ahte inbeihna hi a thleng leh a, US chuan Israel chu inkahhai puang turin a duh tih vawi tam tak hrilh mah se, awmzia a nei rih lo. US National Security Adviser Jake Sullivan chuan Israel chu nakin hun ngaihtuaha fing taka thutlukna siam tura a duh thu a sawi a, tuna indona an titawp lo a nih chuan nakin hunah helpawl buaipuiin an hun leh tha an la seng dawn niin a sawi. Heng avang hian Israel chuan inkahhai puangin, indona avanga thil tihchhiatte thawm ṭhat lamah an ngaihtuahna seng tawh zawk se, a ti.

Israel chuan bomb leh sipai chakna hmangin Rafah mai bakah hmar lama Jabalia refugee camp leh Gaza laili laia Nuseirat camp-te chu a bei a, darkar 24 chhungin nunna chân 82 an awm belh niin Palestine health ministry chuan a tarlang.

Tun hnaia inbeihna chhuak hi US, Egypt leh Qatar kaihhruai, remna zawnga inbiakna chuan a tuar hle a, Qatar PM chuan thil awm dan chu a ṭha lo zawngin a inher a, inbiakna chuan awmzia a awm loh hun a thleng ṭep a ni, a ti. Rafah-a thil thleng avang hian inbiakna chu a hlawhchham mai a hlauhawm niin a sawi.