TikTok hmangtute'n US sorkar an khing

United States (US) sorkarin an rama TikTok titawp tura dan siam tuma hma a lak mek laiin, US khua leh tui mi pariat, TikTok hmang ṭhinte chuan sorkarin dan siam a tum chu mimalin a duh sawi tura zalenna a neih palzutna a ni, tiin an khing.

Sorkar khingtute aiawha ding ukil chuan an rama TikTok khap tumna chu US khua leh tuite'n first amendment an neih palzutna a nih thu sawiin, TikTok company-in kar hmasaa US sorkar hmalak tum dan an khinna an theh luh a thlawp thu leh an ṭawmpui thu a sawi tel bawk. TikTok khapna duh loa sorkar khinna theh luh hi Supreme Court-a ngaihtuah a nih rin a ni. TikTok company thupuangtu chuan heng mi pariatin US sorkar an khinnaa pawisa an mamawh zawng zawng chu an tumsak tur thu a puang zui bawk.

Sorkar khingtute hian TikTok chu anmahni inphochhuah nan leh thil zir nan te, chhan ṭha tak thil tih an neihna hmanrua atan te, an ngaihdan sawi chhuah leh ṭhian siam bakah, eizawnna atan thleng pawha an hman thu an sawi. Mi pariat zinga pakhat, Texas-a ran vulhtu; Brian Firebaugh chuan kum 2020-ah TikTok account a siam ṭan thu sawiin, a ran vulh aṭanga eizawnna mumal zawk nei tura TikTok a hman ṭangkai thu te, a hnua ran vulh bansana, TikTok kaltlanga eizawnna a neih chhunzawm tak thu te a sawi. Chloe Joy Sexton pawhin a hna hmasa a chân hnua TikTok kaltlanga tuna a cookie siam lar chho thei ta chauh a nih thu a sawi a ni.

US sorkar hian an rama TikTok khap a nih theih nan dan siam turin a puahchah mek a, he dan tharah hian TikTok neitu company, ByteDance chu thla kua ral hmaa US bika TikTok chu hralh tura phûtin, an hralh lo a nih erawh chuan US aṭanga an inlak chhuah vek a ngai dawn a ni. Hralhna tur an hmu hman a nih erawh chuan thla thum chhung hun pek belh an ni thung ang. Hetih lai hian TikTok leh ByteDance chuan dan thar an khinna theh lut vein, US sorkar chuan hriatthiamna thui tak nei mah se, nakkum January-ah chuan an inlak chhuah tho a ngaih an rin thu an sawi.