Israel-in Rafah a beih chungchang ICJ-in ngaihtuah dawn

Israel-in Rafah a luh loh nana hma la tura South Africa-in International Court of Justice (ICJ) a ngenna chu ICJ in vawiin leh naktuk hian a ngaihtuah dawn. South Africa hian ICJ chu Israel-in Rafah-a a hmalakna tihtawptir turin a ngen a ni.

ICJ hian vawiin hian South Africa lawyer-te hnen aṭangin thusawi an ngaithla ang a, naktukah Israel chhanna a ngaithla ve leh thung ang. South Afrcia hian ICJ hnenah hian tun thla tir khan petition theh lutin, Israel chu Rafah aṭanga an inhnuhdawh nan leh sipai chakna hmanga a beih ṭhinna tihtawptir turin ICJ chu a ngen a ni. Hemi bakah hian Gaza-a chhawmdawlna lak luh a nih theih nana hma la tura thupek siam turin ICJ chu a ngen bawk.

South Africa ngenna ang hian ICJ hian Israel lakah thupek chhuah mah se, a thupek kengkawh turin tih theih a nei tlem hle thung. Hei hi Russia hnena Ukraine rûn tawh lo tura thupek a chhuah hnua, Russia-in ICJ thupek ngai pawimawh loa tun thlenga Ukraine a rûn lui zel chuan a tichiang hle. A thupek zawm lo mah se ICJ chuan tihtheih a neih tlemzia tilangtu a ni.