Krismas-ah Afghanistan-a US sipai awmte haw tir hman duh

US President Donald Trump chuan Afghanistan-a US sipai la awmte chu kumin Krismas-ah chuan haw tir theih vek a duh tawh tih a sawi. 

Hemi chungchang hi President Trump chuan a twitter-ah a tarlang a ni. Mahse national security advisor Robert O'Brien chuan Afghanistan-ah hian nakkum kumtir lam thlengin US sipai 2,500 vel dah chhunzawm rih a rawt thung. 

US leh Afghanistan-a Taliban firfiak pawl chuan kumin February 29 khan inremna ziakin, thla 14 chhungin Afghanistan-a US sipai leh NATO sipai awmte lachhuak turin an inrem a ni. He inremnaah khan Afghanistan-a US sipai 8,600-te chu ni 135 chhunga laklet te, US sipai awm zawng zawngte chu May 2021 ral hmaa US-a thawn kir lehna turte pawh an ziak tel a ni. 

 US president hlui George W. Bush hunlai, kum 2001 September 11 khan Al-Qaida firfiakte chuan World Trade Centre chu thlawhtheihna hmanga beiin an tichhia a, a hunlaia Al-Qaida firfiak hotu Osama bin Laden chu US chuan man tumin hma a la zui nghal a ni. Bin Laden an zawnna kawnga pui a, lo man turin Taliban te hnenah US chuan a hriattir a ni. Mahse Taliban lam hian Bin Laden chu US beihnaah a tel ngei em tih finfiahna an phut thung. 

Hei vang hian US leh NATO ṭangkawp chuan kum 2001 October 7 khan Afghanistan-ah beihpui thlakin, he beihpui  thlak hi Operation Enduring Freedom tia vuah a ni. 

Afghanistan-a US sipai awmte hi US president kalchhuak ta Barack Obama hunlai khan sipai 68,000 aṭangin 34,000-ah tihtlem an ni tawh a, tunah hian US leh NATO sipaite hi 12,000 an la awm mek a ni. Afghanistan-a firfiakte nen an indonaah hian US sipai 2,400 chuang zet an thi hman bawk.