Italy-ah khuahkhirhna thar tichhuak leh Nakkum January 31 thleng emergency pawtsei

Italy ramah Covid-19 hri lengin ziaawm lam a pan hlei thei lo a, hei vang hian hri darh zel tur venna atan sorkar chuan khuahkhirhna thar tichhuak lehin, nakkum January 31 thleng atan state of emergency a pawtsei bawk. 

Prime minister Giuseppe Conte chuan Nilainia cabi­net meeting neih hnuah khuahkhirhna thar siam hi a puang a ni. He kaihhruaina hi nimin aṭang khan hman nghal niin October 31 thleng a huam ang. 

Sorkarin Covid-19 vanga kaihhruaina thar a siamah hian pawn lamah chauh ni lo, in chhungah pawh  chhungkaw member zinga natna leh chak lo zawk an awm emaw midang nena inbiak dawn emaw chuan hmaituamna  hman zel tur tih a ni. Mahse hei hian naupang kum ruk hnuai lam erawh a huam tel lo thung. 

Italy hi Europe ram zingah hripui leng tuar hmasa leh tuar na ber zingah a tel. Kumin January 31 khan hri leng vang hian ram pumah thla ruk chhung atan emergency puan a ni a, hei hi October 15 thleng atan pawhsei a lo ni tawh bawk. Hun eng emaw chen hri lengin ziaawm lam a pan hnuah, hri kai an pun chhoh leh tak avangin cabinet chuan nakkum January 31 thleng atan emergency pawhsei hi a rel leh ta a ni. 

World Health Organization (WHO) chuan hmaituam hi Covid-19 laka  inven theihna pawimawh tak a nih thu a lo sawi tawh a, Asia ram hrang hrangah chuan hri len ṭantirh aṭangin hmaituamna hman hi an ngai pawimawh hle. Italy bakah ram hrang hranga Covid-19 hri darhna hmunah pawh hmaituamna vuah chu sorkar pawhin an ngai pawimawh thar a, hmun ṭhenkhatah chuan hmaituam ngei ngei turin mipuite pawh hriattir an ni a, a zawm lote hremna pawh siam a ni bawk. 

August 6 khan Italy-a Covid-19 hri kai thar chu mi 12,700 an awm a, hemi ni aṭanga Nilaini thlenga hri kai thar awm leh chu mi 62,576 an ni. Hei vang hian inkaihhruaina thar hi sorkar chuan a siam leh phah a ni. Italy-a Covid-19 hri kai tawh zawng zawng hi mi 3,33,940 an tling tawh a, an zinga mi 2,35,303 chu enkawl dam tawh niin, he hri thihpui hi mi 36,061 an awm tawh. 

Cabinet meeting chuan Britain, Belgium leh Nether­lands aṭanga Italy-a lutte chu swab test neih tir ngei ngei turin a rel bawk. August 12 aṭang khan Italy sorkar chuan Greece, Spain, Malta leh Croatia aṭanga an ram lut turte chu swab test nei zel turin a lo ti tawh a, September 21 aṭang khan Paris aṭanga an rama lutte swab test a lo neih tir ziah tawh bawk a ni. 

Sorkarin inkaihhruaina thar a siam zawm lote chu  euro 400-1,000 thleng chawitir theih an ni.