US VP candidate-ten debate nei

US Vice President candidate pahnih, Democrat Kamal Harris leh Republican Vice President Mike Pence-te chuan nimin zing, an ram huna Nilaini zan khan live debate an nei. 

Debate hi Salt Lake City-a University of Utah-ah minute 90 chhung neih a ni. 

Candidate-te hian coronavirus leng mek chungchang, vaccine, economy, healthcare, tax, supreme court, policy, racial justice, climate change, US military leh China chungchangte an sawi. 

Democrat Kamala Harris chuan President Donald Trump chu an ram chanchina President hlawhchham lian ber niin a sawi. Hetih lai hian Mike Pence chuan Democrats party-in hri leng dona kawnga ruahmanna a siam chu White House ruahmanna siam ru chhawnga a puh let a, kum 1987-a Joe Biden-a'n president chuh a tumna a tawp phahna, British Labour leader Neil Kinnock thusawi  a ruk chhawn chungchang nen a tehkhin zui. 

Kum 55 mi Harris chuan inthlan hmain Covid-19 vaccine approved tawh sem ni se a la angem tia zawhna chu, medical professional-ten an sawi a nih loh a, President Trump sawi chauh a nih chuan a lak loh tur thuin a chhang. Hei hi White House coronavirus task force hotu, kum 61 mi Pence chuan rawn chhang nghalin, mipuiten nghakhlel taka an lo nghah mek vaccine chu Trump-a sorkar laia siam chhuah anih vanga a ring ngam dawn lo tih a sawichhuak fo chu thil awm lo tak a ni tiin a lo sawi.

Harris chuan kar liam taa Presidential debate neihah Republican candidate, President Donald Trump chuan mingo dan chungnun duhtu, white supremacist-te demna thu a sawi chhuak duh lo tih sawiin, a dem thu a sawi. Pence chuan hei hi chhangin, Democrats candidate pahnih Biden leh Harris-ten America-ah chi inthliarna a awm tih leh, police-ten hnam tlem zawkte an thliar hrang hle nia an sawi chu America hmusihna anga a ngaih thu sawiin, Harris hian San Franciso-a prosecutor a nih laiin ruihhlo leh a kaihhnawih thubuaiah mingo leh Latino te aiin African American-ten thubuai an nei tam hle zawk tih pawh a hrechiang hle ang tiin a sawi.

Kamala Harris chuan China nena trade war neihah President Trump chu a hlohtu zawkah a ṭang niin a sawi. Mike Pence chuan eng angin nge hlohtu nia a ngaih tia zawt letin, Joe Biden chuan he indona hi a la bei ve ngai lo a ti a, kum tam tak chhung China kaltlanga communist thlawptu a ni zawk a ni, a ti. 

Trump chu America ṭhianṭha phatsan a, dictator-te pawm zawkah Harris chuan a puh a, mahse Pence chuan President thlavang hi hauh sak nghalin, Donald Trump hian Islamic State firifak pawl hotu Abu Bakr al-Baghdadi leh an hmelma, Iran general Qasem Soleimani-te thahna tur thupek  tichhuaktu a ni, tiin a sawi ve thung.

Vice presidential candidate-te debate hi a hmaa President candidate pahnih Donald Trump leh Joe Biden-te debate neih angin a boruak a sosang nasa lo a, inhnial leh thusawi lai intihbuai chhen pawh a awm lo a ni. Mahse zawhna ṭhenkhate erawh direct takin an chhang duh lo ve ve thung. Zirchiangtu hrang hrangte chuan debate-ah hian hnehtu zawk an awm lo niin an sawi. President candidate pahnihte aiin an che ṭha zawk nia ngai tam tak awmin, kar liam taa debate mumal lo leh boruak hahthlak tak hnua Vice presidential candidate pahnihten boruak ṭha tak hnuaia debate an nei  chu lawmawm an tih thu an sawi hlawm.